MODELO DE EXAME PAU 2025 HISTORIA DE ESPAÑA

 

 

MODELO DE EXAME  PAU 2025 HISTORIA DE ESPAÑA CÓDIGO 03

 

 O exame consta de 4 preguntas de resposta obrigatoria, de 2,5 puntos cada unha. A primeira sen apartados optativos e as outras tres con posibilidade de elección entre apartados.

 

PREGUNTA 1. SOCIEDADES NO TEMPO: REFLEXIÓN CRÍTICA DE FONTES DE INFORMACIÓN.

(2,5 puntos)

Este curso vostede incorpórase á redacción da revista do seu instituto como encargado/a da sección de divulgación histórica, e os/as seus compañeiros/as explícanlle que xa dispoñen dalgún texto elaborado con ChatGPT. Como a súa versión do programa é antiga, pídenlle que se encargue de revisar o seguinte texto sobre a Monarquía dos Reis Católicos, para detectar, explicar e rectificar posibles erros.

 

TEXTO PARA REVISAR:

O reinado dos Reis Católicos constitúe unha etapa de transición entre o mundo baixomedieval e o moderno na que sentan as bases de funcionamento da monarquía hispánica. Os novos monarcas lograron a unidade de España e levaron a cabo un intenso labor de reforma institucional. Entre outras medidas, potenciaron a administración central reorganizando o Consello Real e incrementando o número de membros con formación universitaria —os letrados—, en detrimento da aristocracia. Tamén reforzaron os órganos encargados de impartir a xustiza real —Chancelerías e Audiencias— e xeneralizaron a figura dos corrixidores en Castela, que exercían como representantes dos reis nos principais municipios. Con todo, a reforma máis importante foi a remodelación das Cortes pola súa condición de institución común a todos os reinos peninsulares.

 

Responda estes tres apartados:

1                    Identifique as informacións erróneas. (0,5 puntos)

2                    Explique o erros detectados. (1,5 puntos)

3                    Proceda á súa redacción correcta. (0,5 puntos)

 

PREGUNTA 2. O CAMIÑO CARA Á CONTEMPORANEIDADE. DAS REVOLUCIÓNS LIBERAIS AO TARDOFRANQUISMO. ANÁLISE COMPARATIVA. (2,5 puntos)

Vostede comeza a traballar nunha radio local que ten previsto realizar unha serie de podcasts sobre a Historia de España. A directora do programa explícalle que a súa intención é ofrecer aos seus oíntes contidos que vaian máis aló dos enfoques tradicionais para presentar os temas desde perspectivas máis razoadas e comparativas. A xefa de redacción encárgalle que presente unha análise comparativa a modo de exemplo para futuros guións.

 

Responda un destes dous apartados:

2.1. Compare as principais disposicións da Constitución de Cádiz co sistema político propio da monarquía absoluta. (2,5 puntos)

2.2. Compare as características do bienio reformista coas do bienio conservador da II República. (2,5 puntos)

 

PREGUNTA 3. O CAMIÑO CARA Á CONTEMPORANEIDADE. DAS REVOLUCIÓNS LIBERAIS AO TARDOFRANQUISMO. COMENTARIO DE TEXTO HISTÓRICO. (2,5 puntos)

Atendendo aos seguintes criterios:

- Identificación do tema. (0,5 puntos)

- Contextualización do documento. (0,5 puntos)

- Comentario do proceso histórico/tema que se reflicte no documento. (1,5 puntos)

Responda un destes dous apartados:

 

3.1. Doc.1. Proclama da Xunta provisional de goberno de Madrid (29 de setembro de 1868):

“MADRILEÑOS: Constituída no nome do pobo a Xunta provisional de Goberno, o seu primeiro deber é dirixirvos a palabra.

A dinastía dos Borbóns rematou (…) O Exército e a Mariña, con abnegación sublime pensaron antes na Patria que en ningunha familia. Desde Cádiz a Santoña resoou o berro de Liberdade, e unhas Cortes Constituíntes elixidas por sufraxio universal decidirán sobre os destinos da Patria. Hoxe, reunidos ante a gravidade solemne das circunstancias, un considerable número de cidadáns constituíu unha Xunta provisional; en tanto que mañá, o pobo todo de Madrid, reunido por barrios e por distritos, formulará a súa vontade soberana”. (2,5 puntos)

 

3.2. Doc.2. O diario ABC de Sevilla recolle nun suplemento especial as declaracións do xeneral Queipo de Llano o 22 de xullo de 1936:

“GUERRA A MORTE ENTRE A RUSIA ROXA E A ESPAÑA SAGRADA

[…] pola intromisión de poderes estranxeiros, que polo órgano conglomerado marxista desvirtuou o carácter da República española […] Había que salvar España da lepra moscovita e para iso emprendemos esta operación de urxencia. A historia hanos de xulgar”. (2,5 puntos)

 

PREGUNTA 4. O MODELO DE DESENVOLVEMENTO ECONÓMICO ESPAÑOL. RETOS DO MUNDO ACTUAL. COMENTARIO DE TÁBOAS DE DATOS. (2,5 puntos)

Atendendo aos seguintes criterios:

- Análise dos datos da táboa. (1 punto)

- Explicación do contido. (1,5 puntos)

 

Responda un destes dous apartados:

4.1. Distribución rexional da produción siderúrxica española: medias anuais en miles de toneladas. (2,5 puntos)

 

Período	Produción			Andalucía			Biscaia	Asturias
1861-1865	45,65	14,65			11,73			13,17
1871-1875	45,53	4,46			8,72			24,90
1881-1885	131,59	2,89			76,71			40,08
1896-1900	289,24					227,69           102,81

 

4.2. Produción de electrodomésticos en España: miles de unidades. (2,5 puntos)

Anos	Frigoríficos	Lavadoras	Radios	Televisores
1960	28,7	77,3	245,1	39,4
1965	371,8	320,4	446,3	554,7
1970	1009,3	554,6	432,5	617,9